Пасяджэнне гэтага аб’яднання былых вучняў Бэнэдыкта ХVI адбудзецца 30 жніўня ў летняй папскай рэзідэнцыі ў Кастэль Гандольфа. Тэма сёлетняй сустрэчы — «Плады экуменізму і пытанні ў дыялогу з лютэранамі і англіканамі». Адпраўной кропкай да дыскусіі будзе кніга кардынала Вальтэра Каспера, былога старшыні Папскай рады спрыяння хрысціянскаму адзінству, «Збор пладоў — асновы хрысціянскай веры ў экуменічным дыялогу», апублікаванай у 2009 г.

Па інфармацыі Ватыканскага радыё, удзельнікі праслухаюць і абмяркуюць даклады, між іншым, кардынала Курта Коха, цяперашняга старшыні Папскай рады спрыяння хрысціянскаму адзінству, і лютэранскага біскупа на пенсіі Ульрыха Вілцкэнса, які з’яўляецца экспертам і перакладчыкам Новага Запавету, чые каментары да Евангелля паводле Яна і Паслання да Рымлянаў маюць вялікае экуменічнае значэнне.

«Я вельмі ўдзячны за тое, што Бэнэдыкт ХVI заўсёды верны сваім вучням. Да кожнага з іх праяўляе цікавасць і асабістую павагу», — сказаў Ганс-Ёахім Яшкэ, дапаможны біскуп Гамбурга.

У мінулыя гады Бэнэдыкт XVI запрасіў сваіх студэнтаў задумацца аб канцэпцыі Бога ў ісламе, аб тэорыі эвалюцыі, экуменізме і місіі, герменеўтыцы Другога Ватыканскага Сабору, а ў мінулым годзе — аб новай евангелізацыі.