Поспех кніг Бэнэдыкта XVI, уключаючы апошнюю, прысвечаную дзяцінству Езуса, можна патлумачыць здольнасцю Пантыфіка «прамаўляць ветлівым і прывабліваючым тонам у духу часу». Аб гэтым напісаў у артыкуле на старонках італьянскай газеты «Corriera della sera» біблеіст і тэолаг, арцыбіскуп К'еці-Васта Бруна Фортэ.

Паводле іерарха, словы якога прыводзіць Ватыканскае радыё, поспех кніг Святога Айца ва ўсім свеце можна назваць «выключным» у эпоху, якую многія называюць постхрысціянскай. Арцыбіскуп Фортэ сцвярджае, што Папа «не ігнаруе вялікія культурныя трансфармацыі, якія адбываюцца на працягу апошніх дзесяцігоддзяў». Тэолаг заўжавае, што сёння распаўсюджаны наіўны давер да рознага тыпу ідэалогій, з дапамогай якіх інтэрпрэтуецца свет. Гэтыя ідэалогіі паўплывалі на распаўсюджванне недаверу да рэлігій. У выніку чалавек, які ідэалогіямі разглядаецца проста як частка агульнай масы, застаўся ў адзіноце, бо яму стала цяжка знайсці месца для іншага і для Бога.

На думку арцыбіскупа, менавіта таму людзей прываблівае прапанова такога Бога, з якім змагаюцца ідэалогіі і якога адмаўляе самотнасць постмадэрнізму. «У той час як дамінуючая культура часта бачыць Бога як абмежаванне для чалавечай свабоды, прапанова Папы-тэолага прываблівае жанчын і мужчын постхрысціянскай, постсекулярнай і постмадэрніскай эпохі», — напісаў іерарх.

Тэолаг сцвярджае, што трылогія Святога Айца «Езус з Назарэта», якая апавядае пра Бога блізкага, чалавечнага і адначасова боскага, «з’яўляецца добрай навіной для нашага часу і яго няўпэўненага духу».

(AG)