Гэта архіў старой версіі сайта. Новая версія знаходзіцца па адрасе catholic.by
Папа да прадстаўнікоў хрысціянскіх Цэркваў і іншых рэлігій: можам зрабіць шмат для тых, хто бедны, слабы і пакутуе |
Святы Айцец |
20.03.2013 16:50 |
20 сакавіка папа Францішак сустрэўся з дэлегатамі хрысціянскіх Цэркваў і прадстаўнікамі іншых рэлігій і веравызнанняў, якія прыбылі ў Ватыкан на яго інаўгурацыю. Сустрэча прайшла ў Клементыйскай зале Апостальскага палаца. Як інфармуе Ватыканскае радыё, Папа заклікаў упоўні жыць дарам атрыманай веры і даваць свабоднае, радаснае і мужнае сведчанне аб ёй. «Гэта будзе нашым найлепшым служэннем на карысць адзінства паміж хрысціянамі, служэннем надзеі для свету, які ўсё яшчэ пазначаны падзеламі, кантрастамі і суперніцтвам. Чым больш мы будзем вернымі Яго волі ў думках, словах і справах, тым больш будзем па-сапраўднаму рухацца ў кірунку адзінства», — адзначыў Святы Айцец. Папа Францішак запэўніў прадстаўнікоў канфесій і рэлігій, што ўслед за сваімі папярэднікамі будзе працягваць шлях экуменічнага дыялога, і папрасіў прысутных аб малітве, «каб мог быць пастырам паводле сэрца Хрыстовага». Святы Айцец звярнуўся да прадстаўнікоў яўрэйскай супольнасці і падкрэсліў, што «Каталіцкі Касцёл прызнае, што карані яго веры і яго абранасць знаходзяцца ўжо, паводле Божай таямніцы збаўлення, у Патрыярхах, Майсеі, прароках». Вітаючы прадстаўнікоў іншых рэлігій, асаблівую ўвагу Папа звярнуў на мусульман, якія таксама «вызнаюць адзінага, жывога і міласэрнага Бога». «Каталіцкі Касцёл усведамляе важнасць спрыяння сяброўству і павазе паміж мужчынамі і жанчынамі розных рэлігійных традыцый, – паўтарыў Святы Айцец. — Ён таксама ўсведамляе адказнасць, якую мы ўсе нясём за наш свет, за ўсё стварэнне, якое павінны любіць і бараніць. І мы можам зрабіць шмат для дабра тых, хто бедны, слабы і пакутуе, для спрыяння справядлівасці, прымірэнню і будаванню міру». Пантыфік вылучыў галоўны прыярытэт для прадстаўнікоў рэлігій: «Перш за ўсё, мы павінны заўсёды падтрымліваць жывой прагу абсалюту ў свеце, не дазваляючы, каб дамінаваў аднабаковы погляд на чалавечую асобу, паводле якога чалавек вымяраецца тым, што вырабляе, і тым, што спажывае: гэта адна з самых небяспечных пастак нашага часу», — звярнуў увагу Святы Айцец.
(AG) |
Пры выкарыстанні матэрыялаў сайта спасылка на Catholic.By абавязкова.