Папа Францішак павіншаваў вернікаў тых Цэркваў, якія жывуць паводле юліянскага календара, са святам Пасхі, якое яны адзначаюць сёння. Пантыфік звярнуўся да іх перад нядзельнай малітвай «Regina cаeli» на плошчы Св. Пятра 5 мая.

«Сёння Усходнія Цэрквы, якія жывуць паводле юліянскага календара, адзначаюць Пасху, — сказаў Святы Айцец. — Хачу скіраваць да гэтых братоў і сясцёр асаблівае прывітанне, яднаючыся ўсім сэрцам з імі ў радасным абвяшчэнні: Хрыстус уваскрос!»

«Сабраныя на малітве вакол Марыі, папросім Бога аб дары Святога Духа Суцяшыцеля, каб супакоіў і суцешыў усіх хрысціян, асабліва тых, хто святкуе Пасху ў выпрабаваннях і пакутах, і няхай вядзе іх па шляху прымірэння і супакою», — дадаў Папа.

(AG)