Подпісы Маці Тэрэзы і кардынала Казіміра Свёнтка можна ўбачыць у музеі аўтографаў, які адкрыўся пры Цэнтральнай гарадской бібліятэцы імя Герцэна ў Гомелі. У сістэматызаванай калекцыі налічваецца больш за 600 аўтографаў вядомых асобаў.

Сярод прадстаўленых ўласнаручных подпісаў вядомых людзей можна ўбачыць аўтографы Уладзіміра Высоцкага, Юрыя Гагарына, Кшыштафа Зануссі, Васіля Быкава, Аляксандра Салжаніцына, Яўгена Еўтушэнкі, Юрыя Башмета і інш. Сярод іх таксама аўтографы Маці Тэрэзы, кардынала Свёнтка, і, як паведамляе сайт гомельскай парафіі, кс. Славаміра Ласкоўскага, пробашча парафіі.

Аўтограф благаслаўлёнай Маці Тэрэзы музею часова прадаставіў кс. Славамір Ласкоўскі. Святар атрымаў яго ў лісце незадоўга да смерці благаслаўлёнай, з якой вёў перапіску аб дзейнасці ў Гомелі яе ордэна.

Ліст з аўтографам кардынала Свёнтка перадаў у музей вернік касцёла Аляксандр Гулевіч. А парафіянка Вольга Яўсеенка перадала кнігу з подпісам паэта Анатоля Сыса.