14 жніўня 2014 г. у мінскім архікатэдральным касцёле Імя Найсвяцейшай Панны Марыі адбудзецца прэзбітэрскае пасвячэнне дыякана Віктара Жука SJ. Кандыдат да прэзбітэрату – першы езуіт у сучаснай гісторыі Беларусі.

Святая Імша пачнецца ў 18.30, яе ўзначаліць і ўдзеліць прэзбітэрскае пасвячэнне Мітрапаліт Мінска-Магілёўскі арцыбіскуп Тадэвуш Кандрусевіч. На Імшу запрашаюцца ўсе жадаючыя.

Дыякан Віктар Жук нарадзіўся і вырас у Пінску. Пасля таго, як скончыў эканамічны факультэт Люблінскага каталіцкага ўніверсітэта, адчуў пакліканне да манаскага жыцця. У 2003 годзе ўступіў у навіцыят расійскага рэгіёну Таварыства Езуса ў Навасібірску. Вывучаў філасофію ў Падуі. Душпастырскую практыку праходзіў у Мілане, адначасова супрацоўнічаў з італьянскімі езуітамі ў ініцыятывах для моладзі. З 2010 г. вывучаў тэалогію ў Рыме. Дыяканскае пасвячэнне атрымаў 2 красавіка 2013 г. у рымскім касцёле Іль-Джэзу (Найсвяцейшага Імя Езуса) сярод 13 кандыдатаў з розных краін. Імшу ўзначаліў кардынал Джанфранко Равазі, старшыня Папскай рады па культуры.

Будучы прэзбітэр жадае ажыццяўляць сваё служэнне ў якасці члена Таварыства Езуса, якое было заснавана Папам Паўлам III па просьбе святога Ігнацыя Лаёлы ў 1540 г. Дэвізам Таварыства Езуса з’яўляюцца словы “Ad majorem Dei gloriam” – “Для большай Божай славы”. Ад пачатку свайго існавання езуіты прысвяцілі сябе абвяшчэнню Евангелля на місіях і апостальству ў галіне адукацыі.

(AG)