10-11 ліпеня адбудуцца дыяцэзіяльныя ўрачыстасці ў санктуарыі Маці Божай Каралевы сем’яў у Тракелях (Гродзенская дыяцэзія). Дэвіз пілігрымкі ў санктуарый і сёлетняга дыяцэзіяльнага свята – “З Марыяй у дарозе навяртання”.

Біскуп Гродзенскі Аляксандр Кашкевіч сардэчна запрашае на ўрачыстасці святароў, кансэкраваных асобаў і вернікаў дыяцэзіі.

“Дарагія пілігрымы! Прыбудзьце са сваіх мясцовасцяў у арганізаваных пілігрымках у санктуарый Маці Божай у Тракелях, каб паглыбіць у сабе тугу па навяртанні і прымірэнні з Богам і бліжнімі, - піша іерарх. - Разам будзем маліцца праз заступніцтва Тракельскай Каралевы аб Божым благаслаўленні для Паўсюднага Касцёла, нашых сем’яў і ўсяго грамадства ў Беларусі”.

Біскуп запрашае ўсіх асабліва на малітоўнае чуванне, якое пачнецца 10 ліпеня ў 21.30, і на пантыфікальную святую Імшу, якая адбудзецца 11 ліпеня ў 10.00.

Таксама з 6 па 10 ліпеня пройдзе пешая пілігрымка Гродна-Тракелі. Пілігрымка пачнецца святой Імшой у гродзенскім катэдральным касцёле св. Францішка Ксаверыя 6 ліпеня ў 9.00.

Праграма ўрачыстасцяў у Тракелях

10 ліпеня

• 21.30 – Марыйны зварот, прывітанне (біскуп Гродзенскі Аляксандр Кашкевіч)
• 21.45 – канферэнцыя “Навяртанне ў кантэксце Фацімскага адкрыцця” (кс. Андрэй Роўба, дэкан Лідскі і пробашч парафіі ў Вавёрцы)
• 22.15 – адарацыя Найсвяцейшага Сакрамэнту (моладзь з парафіі Ліда-Фара)
• 23.45 – падрыхтоўка да святой Імшы
• 24.00 – святая Імша (узначаліць дапаможны біскуп Мінска-Магілёўскай архідыяцэзіі Аляксандр Яшэўскі SDB)

11 ліпеня

• 2.00 – Ружанец (кс. Міхал Ластоўскі, дыяцэзіяльны мадэратар супольнасці Жывога Ружанца)
• 3.00 – Вяночак да Божай Міласэрнасці (кс. Віктар Субель, дэкан Іўеўскі і мадэратар апостальскай супольнасці Дапамогі чысцовым душам)
• 4.00 – канцэрт праслаўлення (моладзевы гурт “Міласць” з парафіі Ліда-Фара)
• 5.00 – традыцыйныя спевы (кс. Валерый Быкоўскі, дыяцэзіяльны мадэратар па справах пакліканняў і малітвы за пакліканых)
• 6.30 – Гадзінкі ў гонар Беззаганнага Зачацця Найсвяцейшай Панны Марыі (а. Антоні Пажэцкі, духоўны кіраўнік Францішканскага Закона Свецкіх)
• 7.30 – святая Імша (канцэлебруюць святары новапрэзбітэры і юбіляры; узначаліць дапаможны біскуп Гродзенскай дыяцэзіі Юзаф Станеўскі)
• 9.00 – прэзентацыя ордэнаў і манаскіх кангрэгацый у Гродзенскай дыяцэзіі (а. Вітальд Пяцельчыц Schp, каардынатар па cправах манаскага жыцця ў Гродзенскай дыяцэзіі)
• 9.45 – падрыхтоўка да святой Імшы
• 10.00 – адпустовая святая Імша (канцэлебраваная на чале з біскупам Пінскім Антоніем Дзям’янкам)

(AG)