27 снежня пройдуць мерапрыемствы, прысвечаныя 90-годдзю з дня нараджэння кс. Ёзаса Булькі, былога пробашча касцёла Святой Ганны ў Мосары Глыбоцкага раёна Віцебскай вобласці.

Праграма:

• 13.00-14.00 – святая Імша-падзяка Богу за дар святарства кс. Ёзаса Булькі (касцёл святой Ганны, в. Мосар).
• 14.30-16.00 – «Ёзас Булька: пропаведзь даўжынёй у жыццё» – вечар памяці, прысвечаны 90-годдзю з дня нараджэння святара (Цэнтр культуры, аг. Удзела, Глыбоцкі р-н).

Ксёндз Ёзас Булька (1925 г. — 9 студзеня 2010 г.) каля 20 гадоў служыў у парафіі ў в. Мосар. Стаў шырока вядомы ў Беларусі і за яе межамі як прапагандыст здаровага ладу жыцця. Святар выступіў ініцыятарам стварэння шэрагу аб’ектаў, якія зрабілі Мосар турыстычнай меккай: антыалкагольны музей, Алея цвярознікаў. Дзякуючы святару многія жыхары Мосара і навакольных вёсак перасталі злоўжываць алкаголем. Ксёндз Ёзас Булька шмат чаго зрабіў для добраўпарадкавання Мосара: па яго ініцыятыве ў вёсцы былі створаны Крыжовы шлях, стадыён, страусіная ферма, дэндрапарк, перад касцёлам узведзены помнік Яну Паўлу II.

У 2005 годзе кс. Ёзас Булька стаў першым беларускім каталіцкім святаром, узнагароджаным прэміяй «За духоўнае адраджэнне». У 2006 годзе ўказам Прэзідэнта Беларусі кс. Булька быў узнагароджаны медалём Францішка Скарыны за ўмацаванне духоўных каштоўнасцяў і прапаганду здаровага ладу жыцця.

Паводле catholicnews.by

(AG)