17 красавіка ў канцэртнай зале Навагрудскай дзіцячай школы рамёстваў (былая музычная школа) адбудзецца аўтарскі музычны вечар кс. Тадэвуша Крыштопіка пад назвай «У Хрысце паратунак».

Падчас выступу святара прагучаць рэлігійныя песні, якія закранаюць тэмы ўзаемаадносін з Богам, выратавання чалавека Езусам з рабства граху і духоўнага стану сучаснага чалавека.

Арганізатарам мерыпрыемства з'яўляецца парафія Св. Міхала Арханёла сумесна з Навагрудскімі раённымі ўладамі.

Ксёндз Тадэвуш Крыштопік нарадзіўся ў 1957 годзе ў в. Шчачынова каля Гродна. Скончыў музычную школу, потым Гродзенскае музычнае вучылішча і Мінскую Кансерваторыю, а таксама Вышэўшую духоўную семінарыю ў Рызе (Латвія).

Прэзбітэрскае пасвячэнне атрымаў у 1987 годзе. Працаваў як святар у Ілукстэ каля Даўгаўпілса, у Новым Двары, Старых Васілішках, Першамайску і Астрыне Шчучынскага раёна, потым у Гродне. Цяпер пробашч у парафіі ў Квасоўцы каля Гродна. Вершы і музыку да песняў пачаў пісаць ужо у першыя гады свайго святарства.

Музычны вечар адбудзецца па адрасе:

г. Навагрудак, вул. Міцкевіча, 9.

Пачатак у 19.00.

(MV)