Генеральны настаяцель Таварыства святога Францішка Сальскага кс. Анхель Фярнандэс Арцімэ SDB наведае Беларусь. Візіт Генеральнага настаяцеля адбудзецца з 8 па 11 ліпеня.

Падчас свайго візіту Генеральны настаяцель жадае ў першую чаргу сустрэцца і пазнаёміцца са сваімі сабратамі, каб паразмаўляць з імі, пачуць радасці і клопаты ў рэалізацыі салезіянскай харызмы ў Беларусі і, канешне, даць свае айцоўскія парады і падтрымаць сваіх духоўных сыноў. Ксёндз Анхель Фярнандэс Арцімэ таксама будзе мець магчымасць пазнаёміцца з салезіянскімі супольнасцямі, якія дзейнічаюць у Беларусі.

Салезіянская сям’я для Генеральнага настаяцеля была, ёсць і заўсёды будзе вельмі важнай. Таму праграма візіту Генеральнага настаяцеля прадугледжвае сустрэчу з прадстаўнікамі Салезіянскай сям’і ў Беларусі, дзе яны атрымаюць магчымасць прадставіць свае групы і падзяліцца з Генеральным настаяцелем сваімі радасцямі і поспехамі ў выхаваўча-душпастырскай працы.

Кульмінацыйным момантам візіту Генеральнага настаяцеля стане святкаванне Дня адзінства Салезіянскай сям’і ў Беларусі 10 ліпеня ў Мінску. Святкаванне пачнецца святой Імшой, якую ўзначаліць ксёндз Анхель Фярнандэс Арцімэ і падчас якой ён звернецца да Салезіянскай сям’і ў Беларусі са сваім пастырскім словам.

Традыцыйная святочная праграма на Дзень адзінства Салезіянскай сям’і прадугледжвае свята для дзяцей і моладзі з вясёлымі конкурсамі. На завяршэнне свята прадугледжана магчымасць сустрэчы моладзі і ўсіх жадаючых з Генеральным настаяцелем. Сустрэча адбудзецца ў свабоднай форме, жадаючыя змогуць задаць Генеральнаму настаяцелю пытанні, асаблівым тыя, якія датычацца справы выхавання ў сучасным свеце і ролі салезіянаў ксяндза Боско. На завяршэнне ксёндз Анхель Фярнандэс Арцімэ звернецца са сваім словам да Салезіянскай сям’і і ўсіх прысутных і ўдзеліць благаслаўленне праз заступніцтва Маці Божай Успамогі Хрысціянаў.

Поўны тэкст Рэгіянальнага настаяцеля кс. Віктара Гайдукевіча SDB з нагоды візіту кс. Анхеля Фярнандэса Арцімэ SDB>>>

Паводле sdb.by

(AG)