12 чэрвеня ў 12.30 у белай зале касцёла святых Сымона і Алены ў Мінску адбудзецца адкрыццё фотавыстаўкі маладога фотажурналіста Віктара Ведзеня «Дарогі, якімі мы Бога шукаем».

Экспазіцыя прымеркавана да 25-годдзя заснавання Мінска-Магілёўскай архідыяцэзіі. Сярэбраны юбілей — сімвал і паказчык таго, што на працягу гэтага часу людзі захоўвалі ў сабе веру, надзею на адраджэнне і з Божай ласкай змаглі пранесці яе ў цяперашні час.

На выстаўцы будуць прадстаўлены выявы пілігрымаў, сюжэты са шляху да Апякункі Беларусі Маці Божай Будслаўскай. За кожным пілігрымам стаяць свае неверагодныя жыццёвыя гісторыі і цуды. Подпісы да здымкаў — своеасаблівыя пасланні, якія дайшлі праз Святое Пісанне, праз прыклады жыцця хрысціян і святых, якія знайшлі гэтую дарогу і паказалі сувязь з Богам. Яны нагадваюць пра тыя праўды, прытрымліваючыся якіх, можна быць міласэрнымі да іншых.

Дадзеная выстаўка — не вынік, а толькі першы крок духоўна-даследчага праекта «Людзі-пілігрымы», які будзе распавядаць гісторыі людзей, якія ідуць гэтай дарогай па жыцці, у каго шлях у будслаўскі санктуарый паўплываў на іх далейшы лёс.

Гэтая выстаўка таксама з'яўляецца спробай навяртання людзей да хрысціянскага ладу жыцця, да Бога, праз малітву і шанаванне святых мясцін, паказвае актуальнасць здзяйснення пілігрымак сёння.

У адкрыцці выстаўкі прымуць удзел духоўныя асобы.

Пасля экспазіцыю плануецца паказаць у касцёле Унебаўзяцця Найсвяцейшай Панны Марыі ў Будславе падчас сёлетніх урачыстасцяў, а таксама ў іншых святынях краіны.

Віктар Ведзень — фотажурналіст, студэнт журфака БДУ. Каля двух гадоў супрацоўнічае з Catholic.by як аўтар і фотакарэспандэнт.

Выстаўка ў мінскім Чырвоным касцёле працягнецца да 27 чэрвеня.
 
Адрас: г. Мінск, вул. Савецкая, 15.
Дадатковую інфармацыю можна атрымаць па тэл. (8029) 395 64 34 Віктар Ведзень