З 14 па 16 жніўня адбудзецца пілігрымка ў Аглону (Латвiя) з удзелам ва ўрачыстасцi Унебаўзяцця Найсвяцейшай Панны Марыі. Арганізоўвае пілігрымку група для падарожнікаў «Каталіцкі пілігрым».

У Аглону за благаслаўленнем адпраўляюцца не толькі католікі, але і прадстаўнікі іншых канфесій, у тым ліку тыя, чыёй адзінай сувяззю з Касцёлам застаецца Аглона. У Латвіі Аглона аб’яўлена святым месцам міжнароднага значэння, а ўрачыстасць Унебаўзяцця Найсвяцейшай Панны Марыі — дзяржаўным святам.

Задоўга перад святочнымі датамі шлях у Аглону цэлымі днямі адмяраюць пешшу паломнікі з розных канцоў Латвіі. Аглонская базыліка кожны год збірае ўсё больш людзей, якія вераць, што менавіта там 14 і 15 жніўня на іх сыйдзе благаслаўленне.

Аглонскі касцёл быў кансэкраваны ў 1751 г. Касцёл і кляштар заснавалі манахі-дамінікане паміж азёрамі Цірышу і Эглес. Першыя будынкі рабіліся з дрэва, але ўжо ў 1768-1780 гг. на іх месцы ўзвялі мураваныя. Сённяшні будынак зроблены ў стылі барока.

Арган, спавядальня, лавы, бакавыя алтары ў касцёле захаваліся з XVIII-ХІХ стст. З Вільнюса (Літва) дамінікане прывезлі ў касцёл знакаміты цудатворны абраз Маці Божай Аглонскай, створаны ў XVII ст.

У крыпце храма размешчаны пахаванні: там пахаваны першы латвійскі кардынал Юльянс Вайводс, а таксама дзве духоўныя асобы з Латгаліі: Апостальскі адміністратар Мінскі і Магілёўскі біскуп Баляслаў Слосканс, працэс беатыфікацыі якога пачаўся ў красавіку 2000 года, і Язэп Ранцанс.

У верасні 1993 года Аглону наведаў і асвяціў базыліку Папа Ян Павел II.

У праграме пілігрымкі таксама наведванне Брамаў Божай Міласэрнасці, адчыненых у санктуарыi Маці Божай Валадаркi азёраў у Браславе, наведванне Старога Вільнюса, Роса — аднаго з найстарэйшых і каштоўных у гісторыка-культурным плане некропаляў Літвы, Вострай брамы — аднаго з найважнейшых помнікаў гісторыі і архітэктуры Вільнюса, аб'екта рэлігійнага паломніцтва і свецкага турызму, якi ўяўляе сабой адзіную захаваную браму гарадской сцяны.

Пілігрымы будуць мець магчымасць пакланіцца цудатворнаму абразу Маці Божай Вастрабрамскай, Маці Міласэрнасці — Апякункі Беларусі і Літвы, памаліцца перад абразом Езуса Мiласэрнага.

Кошт пiлiгрымкi: 100 € + 30 BYN (пры адсутнасці візы), 100 € + 10 BYN (пры наяўнасці візы).

Віза бясплатная.

У кошт увахoдзiць: праезд аўтобусам, суправаджэнне святара, тэматычныя экскурсii згодна з праграмай, медыцынская страхоўка, пражыванне ў дамах пiлiгрымаў, 2 вячэры, 2 сняданкі.

Даведкі і запіс у пілігрымку па тэлефонах:

• + 375 29 618 06 02 Вольга
• + 375 29 632 42 03 Наталля
• + 375 29 613 68 41 Гражына

(MV), (AG)