24 лістапада адбудзецца святкаванне 5-годдзя Дома міласэрнасці ў Лагішыне (Пінская дыяцэзія) — першай касцёльнай сацыяльнай установы ў Беларусі. Будаўніцтва Дома міласэрнасці па благаслаўленні Святога Айца Яна Паўла ІІ распачыналася пры кардынале Казіміру Свёнтку. У лістападзе 2011 года ўстанова была асвячона і ў той жа год прыняла першых жыхароў.

Галоўная мэта дзейнасці Дома міласэрнасці — на пачатках добраахвотнасці, духоўнай, псіхалагічнай, матэрыяльнай і іншых відаў дапамогі аказваць гуманітарную падтрымку ўсім пажылым людзям, не зважаючы на нацыянальнасць і веравызнанне, якія часткова страцілі здольнасць да самаабслугоўвання, а таксама жанчынам у перадродавы перыяд, якіх з-за цяжарнасці не прымае ўласнае асяроддзе, і маці з дзецьмі, якія пакутуюць ад хатняга насілля.

Разлічана ўстанова на 40 месцаў. У яе склад уваходзяць 6 сектараў: 4 жылыя з заламі адпачынку; сектар для аказання медыцынскай дапамогі; гаспадарчы сектар з кухняй, сталоўкай і дапаможнымі памяшканнямі.

(VGr)