Трохгадзінны канцэрт распачнецца ў 19.00 у Доме культуры тэкстыльшчыкаў. Як  паведамляе katolik-gomel.by, тэмай сёлетняга фестываля, які стане бясплатным для наведвальнікаў, стануць словы «Каб усе былі адно».

Першы раз фестываль адбыўся ў Астраўцы ў студзені 2012 года як рок-фестываль рэлігійнай песні. Другім месцам правядзення стаў Гудагай, а апошнія тры гады менавіта Баранавічы прымаюць хрысціянскія гурты з усёй Беларусі.

На баранавіцкай сцэне ўжо паспелі выступіць такія гурты, як «Laudans» (г. Мінск), «Небасхіл» (г. Мінск), «United in Spirit» (г. Баранавічы), «The Cross Way» (г. Баранавічы), «Ave» (г. Гродна), а таксама пратэстанцкія: «Papacletos», «Wisma» і «Crusade» з Брэста і іншыя.

Год 2017

Паводле слоў арганізатараў, сёлета фестываль пройдзе ў новым фармаце. Як адзначыў для Catholic.by душпастыр моладзі Пінскай дыяцэзіі кс. Павел Рудзьман, фестываль будзе ўяўляць сабой малітву, накіраваную на аб’яднанне хрысціянскай моладзі, і распачнецца ён з разважання Святога Пісання.

«Усе сакрэты раскрываць не будзем, але гледачоў чакае шмат прыемных сюрпрызаў», — заключыў святар.

Інфармацыя пра фестываль будзе дапаўняцца.
(IL), фота Марыны Валасар