1 красавіка ў 19.00 у мінскую парафію Найсвяцейшай Тройцы (св. Роха) на Залатой Горцы прыбудуць парэшткі сабакі св. Роха, якія захоўваюцца ў катэдры французскага горада Манпелье.

Беларусь стане першай постсавецкай краінай, у якую прыбудуць парэшткі жывёлы святога. Мінск атрымаў гэта права таму, што толькі ў ёй з усіх сталіц былога СССР знаходзіцца касцёл пад тытулам св. Роха. На шляху падарожжа парэштак сабакі св. Роха значацца таксама Масква, Кіеў і Астана.

Парэшткі прабудуць у мінскай парафіі на Залатой Горцы да 7 красавіка — у гэты дзень у парафіі адбудзецца ўрачыстае асвячэнне хатніх жывёл.

Праграма:

• 1 красавіка
  
• 19.00 — прыбыццё парэштак у парафію
• 20.00 — набажэнства праз заступніцтва св. Роха
• 2 - 7 красавіка
• 8.00 - 20.00 — магчымасць наведаць святыню на Залатой Горцы і пабачыць парэшткі сабакі св. Роха
• 7 красавіка 
• 12.00 — даклад пра выявы жывёл у іканаграфіі гісторыка Ірыны Малюткі. Пасля адбудзецца асвячэнне хатніх жывёл
  

Паводле інфармацыі Мітрапалітальнай курыі, сёння вядуцца перамовы аб прыбыцці ў беларускую сталіцу парэштак і іншых жывёл, звязаных са святымі. Так, на чэрвень у Мінск плануюць прывезці парэшткі ваўка св. Францішка.

У іканаграфіі святы Рох прадстаўлены як пілігрым з сабакам, які залізвае яго раны або бяжыць побач. З гэтым звязана гісторыя жыцця святога.

Чытайце таксама:

• Сімвалы на абразах святых, або чаму св. Роха малююць з сабакам

Рох меў цудоўны дар аздараўляць хворых на чуму, робячы над імі знак крыжа. Такім чынам ён выратаваў шмат жыхароў Рыма падчас эпідэміі, што лютавала там у 1317 г. Аднак, вяртаючыся адтуль, Рох сам захварэў на чуму. У П'ячэнцы ён, пакінуты ўсімі, ужо не спадзяваўся падняцца і чакаў смерці. Аднак тады Роху з’явіўся анёл, які яго падбадзёрыў, а нейкі сабака штодня прыносіў яму хлеб, пакуль Рох цалкам не ачуняў.

Сёння рэліквіі святога знаходзяцца ў Венецыі, дзе ў яго гонар быў пабудаваны касцёл і апекуном якой ён з'яўляецца. Святы з'яўляецца апекуном хворых, урачоў і шпіталяў, а таксама вандроўнікаў; абараняе ад заразы і пошасцяў.

Святы Рох лічыцца таксама апекуном Мінска, бо дзякуючы яго заступніцтву ў горадзе спынілася эпідэмія халеры.

PS. Шаноўныя чытачы! З нагоды сусветнага дня гумару мы жадаем вам пабольш пазітыву і ўсмешак!

Ірына Капітонава, фота Аляксандры Шчыглінскай