У нядзелю 29 студзеня 2012 г. дзве тысячы хлопцаў і дзяўчат з італьянскай Каталіцкай акцыі прымуць удзел у штогадовым «Караване спакою». Двое з іх падчас агульнай аўдыенцыі стануць каля Святога Айца і зачытаюць ліст, скіраваны да Пантыфіка.

Сустрэча дзяцей, што пройдзе паблізу Ватыкана ў замку Святога Анёла, завершыцца ўдзелам у нядзельнай малітве «Анёл Панскі» на плошчы Святога Пятра. Увесь час дзяцей будзе суправаджаць Папскі вікарый Рыма Агостыно Валліні.

На завяршэнне малітвы хлопчык і дзяўчынка, якія будуць стаяць каля Папы, зачытаюць ліст-зварот да Пантыфіка, а пасля, як сімвал спакою, выпусцяць голубаў.

Сёлетняя ініцыятыва «Каравану спакою» праходзіць пад дэвізам «Спыніся і стварай спакой», заклікаючы ўсіх такім чынам спыніць канфлікты, якія пастаянна пагражаюць чалавецтву, каб распазнаць сітуацыю, што вядзе да несправядлівасці, і акрэсліць спосабы і правілы мірнага суіснавання.