Касцёлу як сям’і, створанай паводле Божага плану любові, прысвяціў папа Францішак новы запіс у «Твітэры» 29 мая. «Касцёл нараджаецца з вышэйшага акту любові на крыжы, з адкрытага боку Езуса. Касцёл — гэта сям’я, дзе мы любім і любімыя», — так гучаць словы Пантыфіка.

Гэтай тэме была прысвечана і катэхеза Святога Айца падчас сённяшняй агульнай аўдыенцыі. «Касцёл нясе нам Хрыста і Бога. Касцёл — гэта вялікая сям’я дзяцей Божых, — адзначыў Папа. — Канешне, ён мае таксама чалавечыя аспекты. Тыя, хто яго ўтварае, пастыры і вернікі, маюць дэфекты, недасканаласці, грахі, але ён Божы, з’яўляецца часткай Яго плану любові для ўсяго чалавецтва, з’яўляецца Яго справай».

(AG)