Як кожны месяц, на ліпень падаюцца дзве інтэнцыі малітваў Святога Айца: агульная і місійная. Першая з іх гучыць так: «Каб Сусветны дзень моладзі, які адбудзецца ў Бразіліі, заахвоціў усіх маладых хрысціян станавіцца вучнямі і місіянерамі Евангелля».

Пра Сусветны дзень моладзі папа Францішак казаў у Пальмовую нядзелю 24 сакавіка, заахвочваючы маладых вернікаў несці людзям Евангелле. «Дарагія сябры, я таксама вырушаю з вамі ў шлях, слядамі Яна Паўла ІІ і Бэнэдыкта XVI. З радасцю думаю пра ліпень гэтага года, пра Рыа-дэ-Жанэйра! — адзначаў Пантыфік, якога цытуе польская рэдакцыя Ватыканскага радыё. — Добра падрыхтуйцеся, асабліва духоўна ў вашых супольнасцях, каб гэтая сустрэча была знакам веры для ўсяго свету. Моладзь павінна сказаць свету: добра наследаваць Езуса, добра ісці з Езусам».

Місійная інтэнцыя малітваў Святога Айца на гэты месяц — «каб ва ўсёй Азіі адчыніліся дзверы перад пасланцамі Евангелля». Папа Францішак мае асаблівы клопат пра краіны, дзе вызнаўцы Хрыста церпяць пераслед і дзе памяншаецца іх прысутнасць — у прыватнасці на Блізкім Усходзе.

(AG)