24 ліпеня Святы Айцец Францішак звярнуўся да моладзі праз «Твітэр» з новым запісам. «Дарагія юнакі і дзяўчаты, Хрыстус верыць у вас і даручае вам сваю місію: ідзіце і навучайце!» — так гучаць словы Папы.

У Рыа-дэ-Жанэйра, дзе знаходзіцца з візітам Святы Айцец, 23 ліпеня адкрыўся Сусветны дзень моладзі. «Дазвольце Хрысту абняць вас! — з такімі словамі звярнуўся да моладзі кардынал Станіслаў Рылка, старшыня Папскай рады па справах свецкіх, падчас Імшы на яго адкрыццё. — Даверце Яму свае жаданні, планы на будучыню, вашы найглыбейшыя радасці. Даверце Яму таксама свае самыя складаныя выбары, страхі і непакой, што жывуць у вашых сэрцах». «Хрыстус разлічвае на кожнага з вас!» — дадаў кардынал.

(AG)