26 ліпеня ў межах свайго візіту ў Бразілію Папа спавядаў моладзь у парку «Боа-Віста». На споведзь да Пантыфіка прыйшлі пяць маладых людзей.

Як адзначае руская рэдакцыя Ватыканскага радыё, з пачатку свайго Пантыфікату Святы Айцец не раз шкадаваў аб немагчымасці спавядаць вернікаў так часта, як рабіў гэта падчас ранейшага служэння ў Аргенціне. Таму сакрамэнт пакаяння ў гэты дзень стаў радаснай падзеяй як для пяцярых удзельнікаў Сусветнага дня моладзі, так і для самога папы Францішка.

Пасля Папа сустрэўся ў арцыбіскупскай курыі Рыа-дэ-Жанэйра з некалькімі вязнямі. Пантыфік мае вялікі вопыт душпастырства вязняў і падтрымлівае сяброўскія адносіны з групай вязняў з Аргенціны. На сустрэчу са Святым Айцом прыйшлі шэсць юнакоў і дзве дзяўчыны з выхаваўчых калоній для непаўналетніх.

Моладзь падарыла Пантыфіку вялікі ружанец, на кожнай пацерцы якога напісана імя адной з ахвяраў Кандэларыі, дзе ў 1993 г. здарылася масавае забойства дзяцей вуліцы.

(AG)