Папа Францішак зацвердзіў тэму наступнага 47-га Сусветнага дня міру, які штогод адзначаецца па ініцыятыве Каталіцкага Касцёла 1 студзеня. «Братэрства — фундамент і шлях да міру», — так гучыць тэма.

У спецыяльным паведамленні, апублікаваным 31 ліпеня Прэс-службай Апостальскай Сталіцы, адзначаецца, што «братэрства з’яўляецца спадчынай, якую кожны мужчына і жанчына носіць у сабе ў сілу таго, што з’яўляецца чалавекам, сынам адзінага Айца». Перад абліччам «беднасці, голаду, няроўнасці, несправядлівасці, арганізаванай злачыннасці» братэрства з’яўляецца «фундаментам і шляхам да міру». Дамінуючая культура дабрабыту, гаворыцца ў паведамленні, якое цытуе Ватыканскае радыё, спрыяе аслабленню адказнасці і братэрскіх адносін, бліжні часта ўспрымаецца як вораг, а бедны і патрабуючы разглядаецца як «цяжар» або «перашкода для развіцця».

Звяртаецца ўвага на тое, што «глабалізацыя абыякавасці павінна саступіць месца глабалізацыі братэрства», а братэрства павінна ўвайсці ва ўсе сферы жыцця чалавека, уключаючы эканамічную, фінансавую, грамадскую, палітычную, навуковую, культурную. Папа Францішак, як адзначаецца ў паведамленні, прапануе усім шлях братэрства, каб надаць свету больш гуманнае аблічча.

(AG)