На заканчэнне агульнай аўдыенцыі 6 лістапада Папа Францішак звярнуўся да вернікаў з асаблівай просьбай – памаліцца за хворую дзяўчынку, якую сустрэў па дарозе на плошчу св. Пятра. Пантыфік расказаў, што паўтарагадовае дзіця, якое клічуць Ноэмі, мае цяжкую хваробу.

“Яе бацька і маці моляцца і просяць Пана аб здароўі для гэтага прыгожага дзіцяці”, — сказаў Папа. “Мы яе не ведаем, але гэтая дзяўчынка ахрышчаная, яна адна з нас, яна хрысціянка. Учынім акт любові ў дачыненні да яе, у цішыні папросім Пана, каб дапамог ёй у гэты момант і даў здароўе”, — дадаў Святы Айцец.

Пасля моманту цішыні і малітвы Пантыфік падзякаваў вернікам за гэты акт любові.

Дзяўчынка пакутуе ад спінальнай мышачнай атрафіі – генетычнага захворвання. Яе бацька напісаў ліст Папу Францішку, у якім паведаміў, што адзіны шанc лячэння — выкарыстанне дарослых ствалавых клетак. Складанасць у тым, што італьянскае Міністэрства аховы здароўя забараніла лячэнне гэтым метадам, паколькі ён не правераны і можа быць шкодным. На сённяшні дзень дзяўчынка сілкуецца праз зонд.

Папа некалькі тыдняў таму патэлефанаваў да бацькоў дзяўчынкі, а затым скіраваў да іх свайго элемазінарыя арцыбіскупа Конрада Краеўскага. Затым Пантыфік запрасіў сям’ю ў Дом св. Марты, маліўся з бацькамі Ноэмі, запрасіў іх на абед і вячэру.

Паводле беларускай рэдакцыі Ватыканскага радыё

(AG)