21 лістапада Святы Айцец сустрэўся з Патрыярхамі і вярхоўнымі архіепіскапамі Усходніх Каталіцкіх Цэркваў. Падчас сустрэчы Папа выказаў вялікую павагу да духоўнай спадчыны хрысціянскага Усходу.

Пантыфік адзначыў, што “адзінства з Біскупам Рыма” і “касцёльная камунія”, якія былі ўласным выбарам Усходніх Цэркваў, сталі для іх “дарам Святога Духа”. Папа дадаў, што ўсё гэта нясе з сабой абавязак умацавання еднасці і салідарнасці ўнутры саміх Патрыярхальных Сінодаў.

Святы Айцец заклікаў да адзінства паміж епіскапамі, святарамі і вернікамі. Пантыфік адзначыў, што іерархі павінны разумець і падтрымліваць сваіх святароў. Папа звярнуў увагу на патрэбу празрыстасці ў кіраванні царкоўнай маёмасцю і адкрытасці на патрэбы іншых, дадаўшы, што рэалізацыі ўсяго гэтага можа паспрыяць прынцып сінадальнасці, які “з’яўляецца адметнай рысай Усходніх Цэркваў”.

Святы Айцец папрасіў іерархаў маліцца за яго і засведчыў сваю адкрытасць на іх прапановы адносна жыцця і дзейнасці Касцёла.

Паводле беларускай рэдакцыі Ватыканскага радыё

(AG)