У апошнюю нядзелю студзеня адзначаецца Сусветны дзень барацьбы з праказай, мэта якога – прыцягнуць увагу грамадскасці, органаў кіравання, грамадскіх арганізацый, дзелавых колаў, дабрачынных фондаў, рэлігійных супольнасцяў і прыватных асоб да гэтай праблемы. 26 студзеня падчас малітвы “Анёл Панскі” Папа Францішак нагадаў пра абавязак хрысціян клапаціцца аб хворых, асабліва церпячых на цяжкія захворванні, такія, як праказа.

“Гэтая хвароба, хаця і памяншаецца, аднак надалей закранае яшчэ шматлікіх людзей, асабліва тых, якія жывуць ва ўмовах крайняй нястачы”, - сказаў Папа і заклікаў да салідарнасці з гэтымі братамі і сёстрамі. Пантыфік заахвоціў вернікаў маліцца за іх і за тых, хто клапоціцца аб іх, і рознымі спосабамі імкнуцца перамагчы гэтую хваробу.

У 2013 г. у свеце было зафіксавана больш за 230 тысяч выпадкаў новых захворванняў на праказу.

Паводле беларускай рэдакцыі Ватыканскага радыё

(AG)