Папа Францішак нагадаў, што 11 лютага ў Касцёле будзе адзначацца свята Найсвяцейшай Панны Марыі з Лурда і Сусветны дзень хворых. Па словах Пантыфіка, гэта добрая магчымасць “паставіць у цэнтры супольнасці” хворых людзей, маліцца за іх і знаходзіцца побач з імі.

Святы Айцец падзякаваў за “каштоўную працу” медыцынскім работнікам, якія не толькі займаюцца лячэннем хворага цела, але і сведчаць увагу да асобы. “Годнасць чалавека ніколі не можа зводзіцца да яго здольнасцяў або магчымасцяў; яна не змяншаецца, калі чалавек становіцца слабым, інвалідам і патрабуючым дапамогі”, - падкрэсліў Папа і дадаў, што аб хворых павінны клапаціцца таксама іх родныя.

Пантыфік прызнаўся, што кожны дзень да яго прыходзяць лісты ад такіх сем’яў, якія шукаюць суцяшэння і падтрымкі. Святы Айцец паабяцаў сваю малітву за іх і заклікаў дапамагаць адзін аднаму з любоўю. “Шчодрае і хрысціянскае стаўленне да хворых з’яўляецца соллю зямлі і святлом свету”, - сказаў Папа.

Паводле беларускай рэдакцыі Ватыканскага радыё

(AG)