Папа Францішак заклікае спыніць насілле ў Паўднёвым Судане, аказаць насельніцтву гуманітарную дапамогу і спрыяць наступленню міру. Аб гэтым гаворыцца ў спецыяльным паведамленні, падпісаным Дзяржсакратаром кардыналам Пьетро Паралінам і прачытаным ў катэдральным касцёле ў сталіцы дзяржавы, горадзе Джуба, кардыналам Пітэрам Тарксанам, старшынёй Папскай рады “Iustitia et pax”, падчас Эўхарыстыі на заканчэнне яго пяцідзённага візіту ў гэтую афрыканскую краіну.

“Без міру не можа быць развіцця”, напісаў Пантыфік і нагадаў, што ваенны канфлікт, які захлынуў Паўднёвы Судан, ужо прынёс шматлікія чалавечыя ахвяры, беднасць і голад. “Мы не можам заставацца абыякавымі перад абліччам гэтай рэальнасці”, - падкрэсліў Святы Айцец, звярнуўшыся да міжнароднай супольнасці з просьбай дапамагчы ў вырашэнні канфлікта, а да ўладаў краіны - з заклікам паважаць “законныя маральныя, этычныя і сацыяльныя памкненні грамадзян”. Паводле Папы Францішка, неабходна “спрыяць культуры сустрэчы”, якая прадугледжвае адмаўленне ад эгаізму і здольнасць бачыць у іншым “не ворага, а брата”.

Папа нагадаў, што перыяд Вялікага посту з’яўляецца спрыяльнай нагодай для навяртання сумленняў да справядлівасці, братэрства і дзялення. “Каталіцкі Касцёл асуджае любое насілле і шчодра працуе на карысць атмасферы дыялогу, прымірэння і міру паміж усімі членамі грамадства”, - адзначыў Святы Айцец.

Паводле беларускай рэдакцыі Ватыканскага радыё

(AG)