Папа Францішак скіраваў пасланне землякам бл. Яна ХХІІІ — жыхарам італьянскага рэгіёна Бергама і ў прыватнасці горада Сота-іль-Монтэ, у якім нарадзіўся будучы святы. Зварот Пантыфіка быў апублікаваны ў мясцовым выданні «Рэха Бергама», з якім супрацоўнічаў Ян ХХІІІ, яшчэ будучы звычайным святаром.

«Ведаю, як вы моцна любіце папу Яна і наколькі ён любіў сваю зямлю. З дня яго абрання Пантыфікам назва Бергама і Сота-іль-Монтэ сталі блізкімі ўсяму свету і яшчэ сёння, праз больш чым 50 гадоў, яны працягваюць атаясамлівацца з яго ўсмешкай на абліччы, пазначаным пяшчотнасцю айца», — напісаў Францішак.

Святы Айцец заклікаў жыхароў Бергама дзякаваць Богу за вялікі дар святасці Яна ХХІІІ і захоўваць памяць пра зямлю, дзе яна ўзрастала — «зямлю глыбокай веры у штодзённасці, бедных сем’яў, паяднаных любоўю Пана, супольнасцяў, здольных да дзялення і простасці».

«Канешне, з таго часу свет змяніўся і новымі з’яўляюцца выклікі для місіі хрысціянскай супольнасці. Аднак, гэта спадчына можа натхніць нават і сёння Касцёл, пакліканы жыць салодкай і суцяшаючай радасцю евангелізацыі, быць спадарожнікам на шляху кожнага чалавека, «вясковай студняй», з якой усе могуць чэрпаць свежую ваду Евангелля», — адзначыў Пантыфік.

Паводле Папы Францішка, шлях касцёльнага абнаўлення адкрыў ІІ Ватыканскі Сабор, ініцыяваны Янам ХХІІІ, і быў працягнуты падчас пантыфікату Яна Паўла ІІ. Таму, на думку Святога Айца, супольная кананізацыя гэтых двух Пантыфікаў з’яўляецца крыніцай асаблівай радасці.

Паводле Беларускай рэдакцыі Ватыканскага радыё