Папа Францішак выступіць на міжнароднай канферэнцыі па праблемах харчавання. Як заявілі ў Харчовай і сельскагаспадарчай арганізацыі ААН, Святы Пасад пацвердзіў удзел Пантыфіка ў форуме.

Генеральны дырэктар ФАО Жазэ Грацыяна да Сільва выказаў задавальненне гэтым фактам, адзначыўшы, што Папа Францішак выступае за будучыню, у якой кожнаму чалавеку будзе забяспечана дастатковая колькасць прадуктаў харчавання.

Канферэнцыя, арганізаваная ФАО сумесна з Сусветнай арганізацыяй аховы здароўя, будзе праходзіць з 19 па 21 лістапада ў Рыме. Гэта ўжо другі з 1992 г. форум такога маштабу, прысвечаны праблеме голаду ў свеце. На сустрэчы будуць прысутнічаць кіраўнікі дзяржаў і іншыя высокапастаўленыя палітыкі, прадстаўнікі міжнародных арганізацый і грамадзянскай супольнасці, якія абмяркуюць стратэгіі ў барацьбе з голадам і недаяданнем.

Па дадзеных Харчовай і сельскагаспадарчай арганізацыі ААН, 842 мільёны чалавек у свеце пакутуюць ад хранічнага голаду. Кожны год па прычыне недаядання памірае 7 мільёнаў дзяцей.

Паводле беларускай рэдакцыі Ватыканскага радыё

(AG)