У святле складанай сітуацыі ў Іраку Святы Айцец прызначыў кардынала Фернандо Філоні, прэфекта Кангрэгацыі Евангелізацыі Народаў, сваім пасланнікам у гэтую краіну, каб выказаць асабістую блізкасць пакутуючаму насельніцтву і прынесці яму салідарнасць Касцёла. Аб гэтым гаворыцца ў спецыяльным паведамленні, апублікаваным 8 жніўня 2014 г.

7 жніўня кіраўнік Прэс-службы Апостальскай Сталіцы а. Фэдэрыко Ламбардзі прачытаў зварот Папы Францішка ў сувязі з сітуацыяй у Іраку, у якім Пантыфік звярнуўся да міжнароднай супольнасці і сумленняў усіх з заклікам пакласці канец “трываючай гуманітарнай драме” ў гэтай краіне, абараніць пераследаваных і дапамагчы тым, хто застаўся без даху над галавой. Папа з заклапочанасцю сочыць за навінамі, якія прыходзяць з Ірака, і далучаецца да закліку мясцовых біскупаў аб малітве ўсяго Касцёла аб дары міру для гэтай краіны. Святы Айцец звярнуўся да вернікаў праз свой акаунт у “Твітэры”, дзе напісаў: “Прашу ўсіх людзей добрай волі далучыцца да маёй малітвы за іракскіх хрысціян і ўсе супольнасці, якія падвяргаюцца пераследу”.

У выніку наступлення ісламскіх тэрарыстаў у Іраку быў захоплены шэраг гарадоў з хрысціянскім насельніцтвам. Ратуючыся ад насілля, каля 100 тысяч вызнаўцаў Хрыста, сярод якіх жанчыны, пажылыя людзі і дзеці, пакінулі свае дамы і пешшу накіраваліся на поўнач краіны. Пустымі засталіся цэлыя вёскі, да гэтага заселеныя хрысціянамі.

Паводле беларускай рэдакцыі Ватыканскага радыё

(AG)