21 чэрвеня 2015 г. Папа Францішак наведае італьянскі Турын, каб памаліцца перад знакамітай Турынскай плашчаніцай і ўшанаваць памяць ураджэнца гэтай зямлі св. Яна Боско з нагоды 200-годдзя з дня яго нараджэння. Аб гэтым Пантыфік абвясціў асабіста на заканчэнне агульнай аўдыенцыі ў Ватыкане 5 лістапада.

Выстаўленне славутай рэліквіі для публічнага ўшанавання вернікамі будзе адбывацца ў рамках святкавання юбілею італьянскага святога, з 19 красавіка па 24 чэрвеня 2015 г. Апошні раз Турынская плашчаніца выстаўлялася для публічнага ўшанавання вясной 2010 г. У яе адарацыі прынялі ўдзел больш за 2 млн. чалавек, сярод якіх быў таксама Папа Бэнэдыкт XVI.

Папа Францішак яшчэ не наведваў Турын, але прымаў удзел у відэаадарацыі перад славутай рэліквіяй, якая праводзілася ў Вялікую суботу 30 сакавіка 2013 г. праз каналы італьянскага тэлебачання “Rai”. Тады Святы Айцец звярнуўся да вернікаў з адмысловай прамовай, у якой адзначыў каштоўнасць Турынскай плашчаніцы — рэліквіі, якая «прамаўляе да нашага сэрца і падштурхоўвае ўзысці на гару Кальварыю, глядзець на дрэва крыжа і пагрузіцца ў красамоўнае маўчанне любові». «Дазволім гэтаму позірку, скіраванаму не ў нашы вочы, а ў сэрца, дасягнуць нас. Паслухаем тое, што ён хоча сказаць нам, у маўчанні, пераходзячы праз саму смерць», — заклікаў у той час у сваім звароце Пантыфік.

У сувязі з вялікай колькасцю пілігрымаў, якія прыбудуць з усяго свету, каб ушанаваць Турынскую плашчаніцу, абавязковай з’яўляецца папярэдняя рэгістрацыя. У рамках выстаўлення рэліквіі прадугледжаны шэраг ініцыятыў на карысць моладзі, хворых і людзей з абмежаванымі магчымасцямі.