12 лютага ў Ватыкане Папа Францішак адкрыў кансісторый, на якім будуць разглядацца пытанні рэформы Рымскай курыі. У сваім звароце да ўдзельнікаў пасяджэння Пантыфік падкрэсліў, што асноўная мэта кансісторыя — спрыянне гарманізацыі працы розных ведамстваў, наладжванне больш эфектыўнага супрацоўніцтва ў духу абсалютнай празрыстасці, сінадальнасці і калегіяльнасці.

Па словах Святога Айца, рэформа — гэта не самамэта, а спосаб данесці да людзей хрысціянскае сведчанне, спрыяць больш эфектыўнай евангелізацыі, стварыць умовы для плённага экуменізму, спрыяць больш канструктыўнаму дыялогу з усімі. Рэформа, у падтрымку якой выступіла большасць кардыналаў яшчэ перад канклавам, павінна будзе яшчэ больш удасканаліць ідэнтычнасць Рымскай курыі, дапамагчы наступніку св. Пятра ў выкананні яго вышэйшых пастырскіх абавязкаў на карысць Паўсюднага і мясцовых Касцёлаў. Гэтыя пастырскія абавязкі накіраваны, як адзначыў Папа Францішак, на «ўмацаванне адзінства веры, камуніі Божага народа і выкананне місіі Касцёла ў свеце».

Дасягнуць гэтай мэты нялёгка: для гэтага неабходны час, рашучасць і супрацоўніцтва кожнага. «Менавіта ў духу супрацоўніцтва, — упэўнены Папа, — і распачынаецца першае пасяджэннне кансісторыя, плён якога будзе залежыць ад удзелу кожнага, а таксама ад усведамлення неабходнасці спрыяць выкананню найвышэйшага закона — збаўлення душ».