У Вялікі чацвер, 2 красавіка, Пантыфік узначаліць святую Імшу Вячэры Пана ў рымскай турме «Рэбібія». Эўхарыстыя адбудзецца ў касцёле новага комплексу гэтай пэнітэнцыярнай установы. У ёй прымуць удзел шматлікія зняволеныя — як мужчыны, так і жанчыны. Дванаццаці з іх Папа Францішак абмые ногі, згодна з абрадам, уласцівым гэтай літургіі.

Традыцыю цэлебрацыі святой Імшы Вячэры Пана ў адной з турмаў, бальніц ці прытулкаў для бедных і выкінутых на ўзбочыну сацыяльнага жыцця Папа Францішак прынёс са свайго душпастырскага досведу служэння ў якасці арцыбіскупа Буэнас-Айрэса. У папярэднія два гады свайго пантыфікату Святы Айцец цэлебраваў гэту літургію ў рымскай калоніі для непаўналетніх «Casal del Marmo» і ў сацыяльным цэнтры «Santa Maria della Provvidenza», у якім пражываюць людзі з абмежаванымі магчымасцямі і пажылыя.

Папа Францішак стане трэцім Пантыфікам, які наведае рымскую турму «Рэбібія». У 1983 г. тут быў св. Ян Павел ІІ, а ў 2011 г. — Бэнэдыкт XVI.