Папа Францішак правёў сустрэчу з кіраўнікамі ўсіх ведамстваў Апостальскай Сталіцы. Яна адбылася раніцай 18 мая ў Балонскай зале Апостальскага палацу. У цэнтры ўвагі Святога Айца і ватыканскіх іерархаў было правядзенне Года Божай Міласэрнасці. Сустрэча праходзіла за закрытымі дзвярыма.

У межах Года Міласэрнасці Ватыкан наведаюць мільёны пілігрымаў. Некалькі дзён таму адбылося пасяджэнне адпаведна створанай ватыканска-італьянскай каардынацыйнай групы, у якую ўваходзяць высокія касцёльныя іерархі, прадстаўнікі ўраду, муніцыпальных і рэгіянальных органаў улады.

Юбілейны Год пачнецца ў Касцёле 8 снежня 2015 г., у свята Беззаганнага Зачацця Найсвяцейшай Панны Марыі, і будзе працягвацца да ўрачыстасці Хрыста Валадара Сусвету, 20 лістапада 2016 г. Яго афіцыйнае абвяшчэнне адбылося 11 красавіка 2015 г. выданнем папскай булы “Misericordiae Vultus”.

Паводле беларускай рэдакцыі Ватыканскага радыё, (AYU)