Папа Францішак нагадаў, што 18 чэрвеня будзе выдадзена яго энцыкліка пра клопат аб “супольным доме”, якім з’яўляецца стварэнне.

“Гэты наш дом разбураецца, што наносіць шкоду ўсім, асабліва самым бедным. Я заклікаю да адказнасці на падставе задання, якое Бог даў чалавеку падчас стварэння: “апрацоўваць і даглядаць” “сад”, у якім быў паселены (пар. Быц 2, 15). Заахвочваю ўсіх прыняць з адкрытай душой гэты дакумент, упісаны ў лінію сацыяльнага навучання Касцёла”, - сказаў Святы Айцец 17 чэрвеня напрыканцы агульнай аўдыенцыі ў Ватыкане.  

Энцыкліка Папы Францішка на тэму экалогіі будзе называцца “Laudato si’. Пра клопат аб супольным доме” і стане першым дакументам такога ўзроўню, цалкам прысвечаным пытанням навакольнага асяроддзя. “Laudato si”’(Будзь праслаўлёны) – гэта ўскліканне з паэтычнай малітвы св. Францішка Асізскага, напісанай каля 1225 г. і вядомай як “Гімн стварэнню” або “Гімн брату Сонцу”.

Пантыфік таксама нагадаў, што 20 чэрвеня будзе адзначацца Сусветны дзень бежанцаў. Папа заклікаў маліцца за ўсіх людзей, якія шукаюць прытулку і дому далёка ад роднай зямлі, каб мець магчымасць жыць без страху і адчуваць павагу да сябе. “Падтрымліваю працу ўсіх, хто нясе ім дапамогу, і заклікаю міжнародную супольнасць дзейнічаць адзінадушна і эфектыўна, прадухіляючы прычыны вымушанай міграцыі. Заклікаю ўсіх прасіць прабачэння за асобаў і стуктуры, якія зачыняюць дзверы перад гэтымі людзьмі, што шукаюць сям’ю, што жадаюць быць абароненымі”, - сказаў Святы Айцец.

Паводле беларускай рэдакцыі Ватыканскага радыё

(AG)