Падчас палёту з Рыма ў сталіцу Эквадора Кіта 5 ліпеня Папа Францішак сказаў журналістам, якія суправаджалі яго, што атрымаў афіцыйнае запрашэнне ад канцлера Ангелы Меркель наведаць Германію.

“Гэта вельмі добрая справа. Візіт павінен быць еўрапейскай міратворчай місіяй”, - падкрэсліў Пантыфік. Папа не назваў канкрэтнай даты, але паведаміў, што Германія знаходзіцца ў яго бягучых планах замежных падарожжаў.

Вядома, што Святога Айца запрасіла і Канферэнцыя Біскупаў у Германіі. Чакаецца, што ў бліжэйшы час запрашэнне скіруе Прэзідэнт Ёахім Гаўк. Акрамя таго, Апостальскі Нунцый у Берліне арцыбіскуп Нікола Этэравіч пацвердзіў нядаўна планы Пантыфіка паехаць у ФРГ.

Паводле беларускай рэдакцыі Ватыканскага радыё

(AG)