Папа Францішак скіраваў пасланне на XXIV Сусветны дзень хворага, які будзе адзначацца ў Каталіцкім Касцёле 11 лютага 2016 г. У ім Пантыфік заклікаў патутуючых ад хваробаў даверыцца Панне Марыі і паглядзець на свае цярпенні праз прызму веры.

Перад абліччам хваробы, як адзначыў Папа, вельмі лёгка паддацца роспачы, але менавіта ў такія моманты «вера ў Бога раскрывае ўвесь свой пазітыўны патэнцыял». Вера, напісаў Пантыфік, не дае хваробе ці болю знікнуць, але дае святло, каб паглядзець на іх па-новаму, адкрывае «самы вялікі сэнс» таго, што перажывае чалавек. Аб такім святле неабходна прасіць Маці Божую, дадаў Святы Айцец.

Папа нагадаў, што ў евангельскім аповедзе пра вяселле ў Кане Галілейскай менавіта Марыя заступілася за людзей. Яна, па словах Пантыфіка, мае «пільныя і добрыя вочы», а таксама «матчынае і поўнае міласэрнасці сэрца»; у Яе клопаце адлюстроўвацца пяшчота Бога, тая самая, якую нясуць хворым асобы, якія клапоцяцца пра іх: маці, якія даглядаюць сваіх малых дзяцей; дзеці, якія глядзяць за сваімі пажылымі бацькамі; унукі, якія чуваюць побач са сваімі бабулямі ці дзядулямі. Папа заклікаў іх даверыцца Маці Божай і прасіць для хворых аб ласцы здароўя, а таксама аб «нечым большым»: «аб жыццёвым спакоі, які нараджаецца ў сэрцы і з’яўляецца дарам Бога».

Святы Айцец дадаў, што на вяселлі ў Кане былі слугі, якія напоўнілі амфары вадой, затым перамененай Езусам у віно. Гэтыя «ананімныя постаці» могуць «навучыць нас многаму», таму што «шчыра паслухаліся і неадкладна зрабілі тое дабро, якое ад іх патрабавалася, без нараканняў і разлікаў», заўважыў Папа.

Па словах Святога Айца, гэтае апавяданне паказвае, што Езус разлічвае на супрацоўніцтва чалавека, на «яго гатоўнасць служыць патрабуючым і хворым». Гэта можа быць складанае служэнне, але Пан пераменіць яго ў «нешта боскае», таму што «служэнне іншым робіць нас падобнымі да Езуса, больш, чым штосьці іншае», напісаў Папа Францішак.

Паводле беларускай рэдакцыі Ватыканскага радыё

(AG)