Падарожжа ў Афрыку стане для Папы Францішка нагодай, каб зноў заклікаць да міру прадстаўнікоў усіх рэлігій і перасцерагчы ад выкарыстання імя Бога для апраўдання насілля, адзначыў Дзяржаўны Сакратар Яго Святасці кардынал П’етро Паралін 20 лістапада ў інтэрв’ю Ватыканскаму тэлебачанню.

Іерарх дадаў, што апошняе Святы Айцец лічыць блюзнерствам: гэтыя людзі не праслаўляюць Бога, але цяжкім чынам абражаюць Яго імя і Яго любоў да людзей.

У Афрыцы Пантыфік скіруе заклік да супрацоўніцтва паміж рэлігіямі ў будаванні міру, паяднання, братэрства ў свеце, падзеленым рознага кшталту канфліктамі. «Сёння рэлігіі павінны знайсці магчымасць для супольнай працы, каб дапамагчы чалавецтву стаць больш братэрскім і салідарным, перш за ўсё праз міжрэлігійны дыялог», — сказаў бліжэйшы супрацоўнік Пантыфіка.

Кардынал адзначыў, што сярод тэм, якія Папа будзе ўздымаць у рамках свайго візіту ў Кенію, Уганду і Цэнтральнаафрыканскую Рэспубліку, несумненна будуць барацьба з беднасцю і абарона навакольнага асяроддзя.

Візіт Святога Айца ў Афрыку працягнецца з 25 па 30 лістапада. Гэта будзе адзінаццатае Апостальскае падарожжа Папы Францішка.

Паводле беларускай рэдакцыі Ватыканскага радыё

(AG)