Папа Францішак выказаў падзяку біскупам ЗША за збор ахвяраванняў на карысць Касцёла ў краінах Лацінскай Амерыкі і Карыбскага рэгіёну. Ініцыятыва ўзнікла ў 1966 годзе і сёлета адзначыць свой 50-гадовы юбілей.

Святы Айцец назваў яе «знакам адзінства і салідарнасці», «каштоўнай прыладай для духоўнай і матэрыяльнай падтрымкі» рэгіёна, спосабам «пашырэння Валадарства Божага, Валадарства справядлівасці, святасці і міру».

«Я перакананы, што з дапамогай Канферэнцыі Біскупаў Злучаных Штатаў Амерыкі і асобных людзей збор ахвяраванняў працягне прыносіць багатыя плёны для духоўнага жыцця і евангельскага сведчання Касцёла ў Лацінскай Амерыцы», — напісаў у спецыяльным лісце Пантыфік.

Акцыя салідарнасці праводзіцца кожны год у студзені пад дэвізам «Падзяляць веру». Сёлета збор ахвяраванняў будзе адбывацца 23-24 студзеня.

«Касцёл у Лацінскай Амерыцы знаходзіцца перад абліччам шматлікіх выклікаў, такіх, як недахоп рэсурсаў для дапамогі ў духоўным жыцці вернікаў, недахоп святароў, ізаляванасць шматлікіх супольнасцяў», — падкрэсліў старшыня падкамітэта амерыканскага епіскапату, адказнага за ініцыятыву, біскуп Эўсебіо Элізонда. 

Іерарх адзначыў, што існуе тэрміновая патрэба ў падтрымцы евангелізацыйнай дзейнасці ў гэтым рэгіёне свету. Біскуп дадаў, што за 50 гадоў ініцыятыва дала значныя вынікі.

Паводле беларускай рэдакцыі Ватыканскага радыё (MV)