Папа Францішак выказаў сваю «глыбокую заклапочанасць» драматычным лёсам грамадзянскага насельніцтва, якое пакутае ад цяжкіх баёў у Сірыі і вымушана ўцякаць, каб пазбегнуць жахаў вайны.

7 лютага падчас сустрэчы з вернікамі на малітве «Анёл Панскі» ў Ватыкане Пантыфік паўтарыў сваё неаднаразова выказанае спадзяванне, што сірыйскі народ адчуе «шчодрую салідарнасць» і неабходную дапамогу міжнароднай супольнасці ў «забеспячэнні выжывання і годнасці». Святы Айцец заклікаў да тэрміновых намаганняў па арганізацыі перамоў паміж бакамі.

«Толькі палітычнае вырашэнне канфлікту зможа гарантаваць будучыню паяднання і міру ў гэтай любай і шматпакутнай краіне, за якую я запрашаю вас шмат маліцца», — сказаў Папа, звяртаючыся да вернікаў, сабраных на плошчы св. Пятра.

Паводле беларускай рэдакцыі Ватыканскага радыё

(AG)