Развітанне Святога Айца з католікамі Мексікі прайшло ў аэрапорце Ц’юдад Хуарэс. Падарожжа ў гэту лацінаамерыканскую краіну стала 12-м у спісе замежных пілігрымак Пантыфіка.

Папу Францішка віталі на развітанне сотні і тысячы людзей. Падобная сітуацыя назіралася і ў аэрапорце, дзе ў зале побач з VIP-залай з Пантыфікам развітаўся Прэзідэнт Мексікі Энрыке Пенья Ньета з жонкай.

Святога Айца праводзіла таксама шмат дзяцей. Прагучалі гімны Мексікі і Апостальскай Сталіцы, пасля чаго настаў час развітання з асобамі, якія суправаджалі Папу Рымскага ў паездцы, а таксама з прадстаўнікамі мексіканскіх уладаў.

Прэзідэнт Мексікі разам з жонкай пад акампанемент традыцыйнай мексіканскай музыкі правялі Пантыфіка да самалёта. У 19.15 па мясцовым часе (05.15 па беларускім часе) самалёт Боінг 787-8 з Папам на борце вылецеў у Рым. У аэрапорт Чампіна самалёт павінен прыляцець праз 12 гадзін, пралятаючы над тэрыторыяй Мексікі, ЗША, Канады, Францыі і Італіі.

Паводле KAI (IL)