Толькі ў адкрытае сэрца можа ўвайсці Божая міласэрнасць, сказаў Папа Францішак 3 сакавіка падчас ранішняй Эўхарыстыі ў Ватыкане. У сваёй гаміліі Пантыфік падзяліўся разважаннямі на тэму нявернасці ізраільскага народа і вернасці Бога.

Святы Айцец падкрэсліў, што «Бог заўсёды верны, бо не можа пярэчыць самому сабе», нават тады, калі сустракаецца з нявернасцю людзей.

«Гэта нявернасць Божага народа — таксама і наша, наша ўласная нявернасць, робіць цвёрдымі сэрцы: закрывае сэрцы! Яна не дазваляе пачуць голас Пана, які, як любячы Айцец, просіць нас заўсёды быць адкрытымі на Яго міласэрнасць і любоў», — сказаў Папа Францішак.

Гісторыя з зацвярдзелымі сэрцамі, па словах Пантыфіка, паўтараецца ў евангельскім апавяданні пра кніжнікаў і фарысеяў — настаўнікаў Закона, якія добра ведалі вучэнне, але былі празмерна закрытымі, патрабавалі знакаў з Неба, не прасілі ў Бога аб прабачэнні, бо адчувалі сябе не грэшнікамі, а суддзямі над іншымі.

«Таму людзі былі настолькі ўражаны Езусам і пачыналі верыць у Яго. Яны адчувалі сябе недасканалымі, грэшнікамі, але мелі адкрытыя сэрцы», — падкрэсліў Папа.

На думку Папы Францішка, працэс навяртання, адкрыцця сэрца на Божую міласэрнасць пачынаецца з прызнання ўласнай грэшнасці.

«Калі ты скажаш: “я грэшнік” — сэрца адкрыецца, туды ўвойдзе міласэрнасць Бога, і пачнеш быць верным», — сказаў Святы Айцец.

Пантыфік заклікаў вернікаў прасіць Бога быць верным Яму і адчуваць пачуццё грэшнасці, каб сэрцы не сталі цвёрдымі і сустрэлі ласку прабачэння.

Паводле беларускай рэдакцыі Ватыканскага радыё,

(MV)