Сёстры місіянеркі Божай любові, якія былі забіты на мінулым тыдні ў Емене, «аддалі сваю кроў за Касцёл» і з'яўляюцца не толькі ахвярамі злачынцаў, але і ахвярамі «абыякавасці», адзначыў Папа Францішак.

Пантыфік выказаў сваю блізкасць Кангрэгацыі Сясцёр Місіянерак Божай Любові, заснаванай Маці Тэрэзай з Калькуты, у сувязі з «вялікай стратай», якую яны панеслі.

У еменскім горадзе Адэн сёстры дапамагалі пажылым людзям і «аддалі сваю кроў дзеля Касцёла»; яны сталі ахвярамі «глабальнай абыякавасці» свету да пакут людзей, сказаў Папа Францішак 6 сакавіка ў Ватыкане падчас сустрэчы з вернікамі на малітве «Анёл Панскі».

Пантыфік запэўніў у сваёй малітве за манахінь і іншых людзей, якія загінулі ў выніку нападу, а таксама за членаў іх сем’яў.

Тэрарыстычны напад на дом для пажылых людзей у Адэне адбыўся 4 сакавіка. Разам з манахінямі загінулі дванаццаць чалавек. Забойцы выкралі пажылога святара, які пражываў там.

Аляксандр Гелагаеў паводле беларускай і англійскай рэдакцый Ватыканскага радыё