Святы Айцец «абнавіў» традыцыю дарэння вернікам кішэнных выданняў Евангелля. У нядзелю на плошчы святога Пятра ў Ватыкане пасля малітвы «Анёл Панскі» валанцёры раздалі кішэнны варыянт Евангелля паводле Лукі.

Пантыфік нагадаў, што тэкст гэтага Евангелля чытаецца падчас нядзельнага цыклу бягучага літургічнага года. Менавіта святы Лука перадаў словы Езуса: «Будзьце міласэрнымі, як і Айцец ваш міласэрны» (Лк 6, 36); і яны сталі натхненнем для Юбілейнага Года, які зараз праходзіць у Касцёле.

Францішак падзякаваў валанцёрам з Педыятрычнага дыспансера святой Марты ў Ватыкане, якія бясплатна раздавалі «Евангелле Міласэрнасці паводле св. Лукі» (так азагалоўлена выданне) кожнаму, хто прыйшоў на ватыканскую плошчу. Усяго было надрукавана 40 тысяч асобнікаў.

«Я запрашаю вас прыняць гэтае Евангелле і чытаць яго кожны дзень; і праз гэта міласэрнасць Айца будзе жыць у вашым сэрцы, і вы зможаце несці яго кожнаму сустрэчнаму», — сказаў Пантыфік.

Беларуская рэдакцыя Ватыканскага радыё (АлГ)