19 сакавіка пачаў дзейнічаць акаўнт Папы Францішка ў «Instagram». Пры актывацыі профіля Святога Айца прысутнічалі сузаснавальнік гэтай медыяплатформы Кэвін Сістрам і сакратар Сакратарыяту па камунікацыі Апостальскай Сталіцы кс. Лусіо Адрыян Руіс.

Профіль Пантыфіка называецца «@Franciscus» (з лацінскай мовы – Францішак). Першы фотаздымак, які на ім быў апублікаваны, прадстаўляе Папу, засяроджанага на малітве. Тут быў размешчаны таксама заклік «Маліцеся за мяне» на дзевяці мовах: англійскай, іспанскай, італьянскай, арабскай, французскай, польскай, партугальскай, нямецкай і лацінскай. За першыя некалькі гадзін працы профіля да яго далучыліся больш за 250 тыс. карыстальнікаў сацыяльнай сеткі.

Пра гэту падзею Папа Францішак паведаміў праз свой афіцыйны акаўнт у іншай медыяплатформе, «Twitter». «Я пачынаю новы шлях, у “Instagram”, каб прайсці разам з вамі шляхам міласэрнасці і пяшчоты Бога», – напісаў Пантыфік.

Паводле беларускай рэдакцыі Ватыканскага радыё

(AG)