Пантыфік скіраваў дзве тэлеграмы ў сувязі з трагічнымі падзеямі, якія адбыліся ў Стамбуле (Турцыя), дзе прагрымеў выбух, і Растове-на-Доне (Расія), дзе пацярпеў крушэнне пасажырскі самалёт.

«Яго Святасць Францішак быў засмучаны, даведаўшыся пра чалавечыя ахвяры ў выніку выбуху ў Стамбуле», - гаворыцца ў першай тэлеграме за подпісам Дзяржаўнага Сакратара Папы кардынала П’етро Параліна, накіраванай на імя Прэзідэнта Турцыі Рэджэпа Таіпа Эрдагана. Пантыфік выказаў у ёй сваю «малітоўную салідарнасць» з усімі, хто пацярпеў ад гэтай трагедыі, і «духоўную блізкасць» да тых, хто аказвае дапамогу пацярпелым. «Давяраючы душы тых, хто загінуў міласэрнасці Усявышняга, Францішак просіць Боскай сілы і спакою для тых, хто смуткуе, і ўсёй краіны», - сказана ў тэлеграме.

Пантыфік быў таксама засмучаны, даведаўшыся пра «трагічную авіякатастрофу ў Растове-на-Доне», гаворыцца ў другой тэлеграме. Папа выказаў «свае шчырыя спачуванні родным і блізкім загінулых» і запэўніў у сваёй малітве за душы памерлых і аб Божым суцяшэнні, сіле і надзеі для ўсіх, хто смуткуе аб іх страце.

Паводле беларускай рэдакцыі Ватыканскага радыё

(AG)