Падчас Імшы Вячэры Пана ў Вялікі чацвер Папа Францішак абмые ногі дванаццаці бежанцам.

Літургія пройдзе ў цэнтры для мігрантаў, якія чакаюць атрымання прытулку ў Італіі, паведамілі ў Ватыкане. Гэты цэнтр знаходзіцца ў Кастэльнуова-дзі-Порта, прадмесці Рыма.

Гэта «будзе просты і выразны жэст», знак «служэння і ўвагі да сітуацыі гэтых асобаў», падкрэсліў старшыня Папскай рады па новай евангелізацыі арцыбіскуп Рына Фізікела.

Іерарх дадаў, што літургія ў цэнтры для бежанцаў упісваецца ў кантэкст Юбілею Міласэрнасці, які зараз праходзіць у Касцёле.

«Папа хоча сказаць нам аб патрэбе належнай увагі да самых слабых у гэты гістарычны час, аб тым, што мы пакліканы вярнуць ім годнасць, не адмаўляючыся ад гэтага задання», — адзначыў арцыбіскуп.

«Пантыфік, — дадаў старшыня Папскай рады, — заахвочвае глядзець на Пасху вачыма тых, хто перажывае сваю веру ў служэнні асобам, якія носяць на сваім абліччы сляды пакут і насілля». Арцыбіскуп Рына Фізікела заўважыў, што некаторыя з тых, каму абмые ногі Пантыфік, не з’яўляюцца католікамі.

Беларуская рэдакцыя Ватыканскага радыё (АлГ)