Папа Францішак скіраваў спачувальную тэлеграму ў сувязі з тэрактам на стадыёне горада Эль-Іскандарыя ў Іраку, які забраў жыцці каля 40 чалавек. Святы Айцец выказаў спачуваннi ахвярам злачынства і запэўніў у сваёй малітве за тых, хто загінуў і атрымаў раненні.

Папа заклікаў, каб у адказ на гэтае бессэнсоўнае насілле іракскі народ рашуча адмовіўся ад шляхоў нянавісці і канфлікту і ў еднасці і без страху працаваў на карысць будучыні, заснаванай на ўзаемнай павазе, салідарнасці і свабодзе.

Тэракт адбыўся 26 сакавіка падчас цырымоніі ўзнагароджання мэрам горада Эль-Іскандарыя футбалістаў каманды, якая выйграла турнір. Выбуховае прыстасаванне прывёў у дзеянне тэрарыст-смяротнік. Акрамя тых, хто загінуў, таксама раненні рознай ступені цяжкасці атрымалі каля 60 чалавек.

Паводле беларускай рэдакцыі Ватыканскага радыё

(AG)