Святы Айцец Францішак здзейсніў перадвелікодны візіт да свайго папярэдніка Бэнэдыкта XVI. Пантыфік адправіўся для гэтага ў кляштар «Mater Ecclesiae» ў Ватыканскіх садах, дзе Папа на пенсіі жыве пасля сваёй адстаўкі.

Сустрэча, якая працягвалася каля гадзіны, адбылася ў мінулую сераду, але аб ёй стала вядома толькі цяпер.

Паміж дзеючым Папам Францішкам і Папам на пенсіі Бэнэдыктам XVI склаліся цёплыя адносіны, аб чым першы заяўляў неаднойчы. Іх сустрэчы звычайна адбываюцца на Божае Нараджэнне і Вялікдзень, а таксама ў сувязі з папскімі замежнымі падарожжамі.

Жыццё Бэнэдыкта XVI, які сышоў у адстаўку 28 лютага 2013 г., сканцэнтравана вакол малітвы і медытацыі. Толькі некалькі разоў за гэты час 89-гадовы Папа на пенсіі прыняў запрашэнне свайго пераемніка паўдзельнічаць у вялікіх касцёльных урачыстасцях: у цырымоніях устанаўлення новых кардыналаў і кананізацыі Яна XXIII і Яна Паўла II. Апошні раз Бэнэдыкт XVI публічна з’явіўся на адкрыцці Юбілею Міласэрнасці 8 снежня 2015 г.

У дадатак да малітвы і медытацыі Папа на пенсіі вядзе актыўную перапіску. Нягледзячы на тое, што ў яго ёсць праблемы з хадой, кожны дзень ён робіць кароткі шпацыр па Ватыканскіх садах да Люрдскага грота, дзе моліцца на ружанцы. Бэнэдыкт XVI часам прымае ў сябе наведвальнікаў.

Беларуская рэдакцыя Ватыканскага радыё