Чырвоны колер ілюмінацыі знакамітага рымскага фантана Трэві стане напамінам пра сучасных мучанікаў за веру. Колерам крыві ён заяснее 29 красавіка вечарам. Ініцыятыва павінна прыцягнуць увагу рымлян і гасцей горада да драматычнай сітуацыі мноства людзей, якія ў наш час пакутуюць за сваю веру ў Езуса Хрыста.

Арганізатарам акцыі з’яўляецца Папскі дабрачынны фонд «Дапамога Касцёлу ў патрэбе». Пантыфіка на ім будзе прадстаўляць кардынал Маўро П’ячэнца. Сваім сведчаннем аб сітуацыі сірыйскіх хрысціян падзеліцца біскуп Алепа Антуан Аўда.

«Сістэматычнае парушэнне права на рэлігійную свабоду павінна стаць цэнтральнай тэмай у публічнай дыскусіі, каб пазбегнуць рызыкі абыякавасці і далейшага працягу непрымальных пакут», — падкрэслілі арганізатары ў спецыяльным звароце.

Папскі дабрачынны фонд «Дапамога Касцёлу ў патрэбе» ад самага свайго заснавання ў 1947 г. вядзе барацьбу з пераследам на рэлігійнай глебе. Для гэтага з 1999 года ім штогадова рыхтуецца Даклад аб рэлігійнай свабодзе ў свеце. Сёлета ён будзе прадстаўлены 15 лістапада.

«Змест дакладу будзе бескарысным, калі не стане супольнай спадчынай, калі не ўзрушыць наша сумленне, калі не выклікае публічнай і шырокай рэакцыі на карысць шматлікіх пераследаваных, якія не могуць дабіцца таго, каб іх голас быў пачуты», — паведамляецца на сайце Папскага дабрачыннага фонду.

Паводле беларускай рэдакцыі Ватыканскага радыё,

(MV)