21 красавіка Папа Францішак скіраваў пасланне да групы аргенцінскай моладзі, якая здзяйсняе экспедыцыю на Паўночны полюс. Падарожжа носіць адукацыйны характар і паклікана пазнаёміць юнакоў і дзяўчат з важнасцю аховы навакольнага асяроддзя.

З сабой удзельнікі экспедыцыі нясуць копію энцыклікі Святога Айца аб экалогіі «Laudato si'», а таксама аліўкавую галінку, якая сімвалізуе іх жаданне міру для ўсёй планеты.

У сваім пасланні Пантыфік прывітаў удзельнікаў экспедыцыі і нагадаў пра цяжкую кліматычную сітуацыю. На думку Святога Айца, падобныя ініцыятывы дапамагаюць усвядоміць складанасць сітуацыі навакольнага асяроддзя, вычарпальнасці натуральных рэсурсаў, праблему забруджванняў, а таксама несправядлівага размеркавання багаццяў.

«Шлях, якім вы пройдзеце, дэманструе, што дзякуючы любові, высілкам і працы ў камандзе магчыма ператварыць муры ў масты», — напісаў Папа.

Экспедыцыя аргенцінскай моладзі на Паўночны полюс была арганізавана экалагічнай грамадскай арганізацыяй «Fundación Criteria» і каталіцкай ініцыятывай «Scholas Occurentes» — міжнароднай сеткай школ, якая ўзнікла ў Аргенціне па ініцыятыве Папы Францішка, калі Пантыфік быў арцыбіскупам Буэнас-Айрэса.

Паводле беларускай рэдакцыі Ватыканскага радыё,

(MV)